غربة بقلم احمد جابر

الغربه
كنت ماشى فالحاره
لقيت عمى شباره
راجل محترم كله اماره
وفى السن راجل كباره
تسأله يديك معنى العباره
قولته قولى
يا عم شباره ليه حاسس
أنا بالغربه وأنا بلدى
جوابنى بكل شطاره
قالى
تعالى دا الجواب عندى
وليه ألف اماره
الغربه
مش يعنى تسيب بلادك
إنك تعيش غريب جواها
كل حاجه تبقى غريبه عنك
كله فى حياته لاهى
مالدنيا كلها ملاهى
الأصول ادارت
والمبادئ انهارت
والعادات ومافيش
ولما تتمسك بدينك
يقولوا ارهابى او درويش
والصح أصبح غلط
والغلط هو الصح
يا بلد شيش بيش
خليك وصولى هنا هتعيش
قولتله كلامك حكم
العيب يا ولدى بقى مفيش
الخشا والحيا ماتوا
ابكى عليهم ونوح
والراجل من الست متعرفهوش
والنفاق والكدب صبحوا شغلانه
نافق و هبل وطبل
تبقى اعلامى ولامسؤل كبير
ولا يمكن تبقى وزير
والمحسوبيه عندنا بقت زياده
والرشوه لازم نطلعلها قناع
وميت واحد ليها دفاع
مااصلها بقت عاده
اوعاك تقول عليا مجنون
داانا بكلمك كلام موزون
قولته كمل متوقفشى
بلدى كانت حلوه كما الصبيه
كانت جميله وفتيه
وجاتها عصابه
قالوا بنحب الغلابه
وحبنا للوطن حب عباده
طلعوا لابيحبوا الوطن
ولا الغلابه
قالوا دى بلدنا
لازم يحكمها الديابه
والشعب لازم يخاف
علشان شعبنا يخاف
ما يختشيش
والشعب لينا عبيد
واحنا أسياده
وخلونا عبيييييد
تعليم مافيش
صحه ليه ما أنت
 مش لازم تعيش
واللقمه نجري عليها
جرى الوحوش
معاك فلوس هتعيش
ممعاكش
فى داهيه
خلونا نعيش فى غربه
وبنسكن جوا تربه
قولتله كفايه يا عم شباره
عرفت أنا العباره
وحاسس بالغربه ليه
قالى اصبر
يمكن تلاقى زيك رفيق

أحمد جابر أبو هَنتَش